La cretta ha per mai giugà gia adina ina rolla fitg impurtanta. Nus essan ussa gist tar mia plazza da lavur. Jau sun er sacristana. Jau vom mintga di ad avrir ed a serrar quatter baselgias. Lura entrel jau adina. E quai è in’onur per mai. Jau pens adina che jau possia ussa avrir l’abitaziun da Dieu per la glieud. Per ch’els possian entrar durant il di e far lur uraziuns, esser qua en il silenzi u celebrar in cult divin. Sche jau sun qua da chasa, lura vom jau en schanuglias davant il tabernachel ed avrel propi mes cor en umilitad envers Dieu.

Per il solit cumenz jau cun in’uraziun dad in cudesch d’uraziuns. E suenter vegn jau cun mes giavischs persunals. Cun decisiuns impurtantas che jau hai forsa da prender. Quellas examinesch jau er adina en la cretta. Jau di adina: “Segner, ma dà ti la dretga decisiun.”

Avant in pèr dis è morta ina fitg bun’amia da mai. En la vegliadetgna da 58 onns è’la al lieu da lavur vegnida sdrappada or da la vita. Ed ella è la madritscha da mes figl il pli giuven. E lura sa dumondan ins bain: “Pertge has ti stuì la prender gia tar tai?” Ins sa ch’ella è en buns mauns. Ma tuttina, ella ta manca lura en la vita. Ins enclegia quai lura forsa pir pli tard insacura, per che scopo che quai è ussa stà bun.