Per mai è la cretta fitg impurtanta. Jau pens ch’ella saja in agid en la vita da mintga di, tant en las situaziuns fortunadas sco er en quellas main fortunadas. En situaziuns fortunadas engraziel jau per quai che jau hai survegnì, entant che en situaziuns difficilas rog jau per agid u pazienza per surventscher la vita uschia, sco ch’ella è. En mintga cas è la cretta da grond’ impurtanza, gea.

Jau vi dar in exempel. Jau hai ina figlia cun num Arianna, ella ha 21 onns. En la vegliadetgna da dus onns è vegnida diagnostitgada tar ella ina malsogna genetica fitg rara. Al cumenzament n’era quai betg cler, da tge che quai sa tractia. Igl ha dà muments, surtut la notg, nua che nus eran plain tema e malsegirs areguard l’avegnir. Nus ans avain dumandads, sche ella pudess mai chaminar u discurrer, sche nus pudessan restar en Bregaglia u avessan da midar la professiun. Igl è stà in temp plain dumondas ed anguschas.

L’unic che ans ha quietà e gidà da betg resentir questa tema, è stà nossa cretta en il Segner. Jau hai resenti ina forza che m’ha gidà bunamain dalunga e che m’ha pussibilità da surventscher la situaziun en in’autra maniera.

Jau hai adina cret ch’il Segner na tramettia nagins chastis e difficultads, mabain ch’el ans gidia en mintga situaziun. Jau crai propi, ch’i saja uschia. Ina giada m’ha dumandà ina vendidra en la butia: «Tosca, co pudais Vus esser adina talmain positiva e fortunada?” Jau la hai respundì che quai saja forsa pervi da mes caracter. Mes bab è er adina stà in uman optimistic, forsa sumegl jau mes bab. Lura sun jau arrivada a chasa, hai reponderà quai ed hai ma ditg: “Na, sche jau sun uschia, lura er, perquai ch’il Segner m’ha gidà. El è quel che intervegn e gida da resolver la situaziun.