La cretta è ina part da mia e da nossa cultura, da noss esser. Jau n’hai nagina ferma colliaziun religiusa. Ma jau bad adina dapli d’esser naschì e creschì si en in mund, nua che la cretta ha ina tscherta impurtanza, e nua che mia cretta e mes pensar è influenzà d’ina tradiziun religiusa ch’appartegna a blers umans.

Jau na sun nagin cristian pratitgant. Jau na vom betg mintga dumengia en la baselgia. En sasez vom jau relativamain pauc. Ma jau renconusch en la baselgia in’instituziun che ha ina valur impurtanta per la societad, ina valur che ha da vegnir tgirada ed appreziada.

Jau n’ur betg regularmain, conscientamain e direct a Dieu. Jau hai plitost patratgs che per mai èn absolutamain spirituals e che sa drizzan forsa ad in “jau” extern u ad ina pussanza superiura.

Jau na poss betg dar a Dieu ina vista u ina fatscha. Tenor mes avis è el ina forza, ina forza interna, che l’uman po sviluppar en sai e laschar crescher. Igl è ina forza che respunda sin ils basegns che l’uman po avair, zuppadamain e persunalmain, grev d’identifitgar e da descriver.

En mes pensar ed agir sun jau fitg raziunal. Savens hai jau ina metoda analitica e fitg raziunala: Co è la situaziun? Co vegn la interpretada? Co la ves jau? Quai gida da las giadas er, da chattar la via or da situaziuns magari difficilas.