Jau na vuless betg pretender d’esser extrem crettaivel. Ma jau crai, che las valurs fundamentalas cristianas m’accumpognan di per di. E sche jau ponderesch quai endretg, alura han ellas ina dretg auta impurtanza en mia vita. Malgrà che jau stoss dir da nun esser in che va fidelamain a pregia.

Speranza è insatge, crai jau … Intgin m’ha ditg ina giada che jau saja tras e tras in optimist. Speranza ed optimissem m’accumpognan mintga di en mia lavur, mabain er privatamain. Jau inscuntrel a chaussas ed umans che han basegn da sustegn ed agid, en maniera objectiva e senza pregiudizis. Per als esser in sustegn sin lur ulteriura via professiunala. Per als dar in pau speranza. E per als dar curaschi da reanimar l’atgna forza e da pudair crair puspè vidlonder.

Mintgatant ur jau dal plaschair, sche jau hai il basegn. Jau na vi betg urar mo, cur che jau hai basegn dad insatge u cur che jau vi ch’i ma vegnia gidà. Ma simplamain per dir grazia. Sche jau ur, hai jau il sentiment, gea, là è ina colliaziun.

Famigliarmain na sun jau betg fitg ferm enragischà en la cretta. Jau sun creschi si catolic. Là datti bleras ceremonia, che vegnan simplamain fatgas. Ma da discurrer davart la cretta u da metter la cretta en il center u da tgirar la cretta, quai n’hai jau betg emprais uschia. E perquai n’hai jau quai er betg dà vinavant. Crair è bain ina chaussa relativamain delicata, u betg? Crair, missiunar, gea, quai è difficil. E perquai che quai na vegn er betg celebrà u tgirà en famiglia, sun jau gia cuntent da pudair tgirar quai per mai.