Da pli baud hai jau gì bler dapli cretta, damai cretta … bler dapli pensà vidlonder u tematisà quai, scu ussa. Ed ussa quasi mai. Er mia famiglia per exempel n’ha mai ma vulì mussar la cretta. Jau hai simplamain sez cumenzà a crair. E sco uffant spera ins da las giadas. Sch’ins inscuntra per exempel in bau da noss Segner, ès ins persvas che quai portia fortuna. Da quel temp hai jau schizunt urà, cur che quai ma gieva na uschè bain. Quai è sta uschia forsa enfin la quarta u tschintgavla classa. E suenter è quai daventà adina pli pauc. L’instrucziun da religiun era lungurusa, sco per tuts. Tar la confirmaziun s’han ins lura occupà dapli cun quai. Ma cur che las lecziuns èn stadas a fin, lura è vegnida puspè la vita e lura èsi stà fini.

L’unic che jau hai da far cun la baselgia dapi la confirmaziun, quai è Nadal, la represchentaziun dals uffants. Quai vegn jau anc a guardar, perquai che quai è tradiziun uschia. E baselgia uschiglio … jau na sai gnanc cur ch’igl è cult divin.

Da discurrer ina mes’ura sur da Dieu en nossa vita modern, quai è bunamain in perdatemp. Tuts han da far insatge auter. E sche ina giada i n’è da far nagut, alura prendan ins il handy. Jau na ma pudess mai imaginar da discurrer cun mes collegas er be duas minutas sur da Dieu. Cun excepziun cur ch’i dat ina dumonda critica sur da la Bibla e quai che capita uschia. Da quai hai jau gì gia in pèr discurs. Ma betg da quai ch’ins crai vairamain e nua ch’ins stat.