Eu crai cha la cretta aint il mincha di ais in sai sco ün sentimaint oriund ch’eu n’ha, ch’eu nu definiss uossa gnanca sco cretta, ma chi’d es listess üna tenuta ch’eu n’ha daspö adüna, daspö ch’eu sun sül muond e chi’d es ün accumpognamaint mincha di. E quai es üna forza aint il mincha di, adüna, o eir sch’eu scriv, quai es üna forza chi dà üna sort sgürezza. Quai es cler chi’d es adüna lapro eir il dubi, perche ch’i nu dà quista forza sainza dubi. O il dubi es dafatta constitutiv per quista forza. Ma id es üna forza poetica, üna forza essenziala chi’d es quia e chi’d es per mai sco trar il flà.

Quista forza, quista cretta, ch’eu nun ha uossa defini fich precis, quista cretta, quista comunicaziun cul invisibel, cul secret, ha per mai üna significaziun persunala interna. Ma eu chat chi nu vagliess nüglia scha quai nun as muossess aint in meis fats. Dimena, eu vuless cha meis fats e mias relaziuns persunalas vivan eir in quist spiert.

Eu disch sü l’urazchun, urazchuns fich persunalas. Quai es üna sort meditaziun. Eu nu meditesch, perche ch’eu chat avuonda pussibiltats aint illas fuormas tradiziunalas per mai. Schi, eu discuor cul secret, eu discuor culla forza essenziala, culla forza oriunda, forsa eir cun mai svess. Forsa es quai eir ün dialog cun mai, o mias megldras forzas, o eir forzas forsa negativas per gnir a bröch cun quellas. Aint in mia urazchun es eir suvent glieud ch’eu vez, per exaimpel chi suffrischan, in gazetta sch’eu leg alch. Sch’eu sa ch’inchün es amalà po quella persuna eir gnir avant aint in meis dialog. E quai es ün lö specific chi sumaglia fich al lö ingio ch’eu vegn sch’eu scriv. Per mai es il lö da la cretta il lö da la poesia. Quai es sco duos chombras immensas chi han üna porta chi’d es comunicativa, üna porta chi’s po rivir. La cretta e la poesia han ün’amicizcha, dschessa. Quai nu sto tuornar per tuot la glieud e na per tuot quels chi fan poesias o quellas chi fan poesias. Ma per mai es quai fich daspera. La poesia e la cretta, o dschaina la cretta apunta, quai es uschè ün pled chi’d es collià fich ferm cun üna confessiun. Eu less tour our da la confessiun. Eu less tour quai sco lö da la comunicaziun cul invisibel, cul grond secret, culla forza essenziala o oriunda.

Eu crai scha la cretta es propi massa ferm be aint il cheu, es be üna teoria, lura dvainta svelt ideologic o apunta i’s sto esser d’accord cun üna confessiun tschient per tschient o cun üna gruppa chi ha tschertas reglas. E cler, eu’m vez eir aint in üna tradiziun. Eu sun üna part d’üna tradiziun lunga. Ma per mai es quai plütost alch chi deliberescha meis cheu e chi deliberescha meis corp. Quai es üna roba fich, fich corporala per mai. Quai nun es üna roba intellectuala in prüma lingia, quai es üna roba fich corporala, fich emoziunala, üna nudritüra per l’orma.