La cretta ma dat en mia vita dal mintgadi segiramain in sustegn. Ella è sco in fundament ch’ è simplamain qua. In fundament cun ragischs che tegnan ferm en ils urizis e chaussas che siglian tuttenina dad isch en. Uschia na vegns ti betg suflada davent ed er betg stratga davent d’in’ unda che vegn sco d’in tsunami. Ella ta dat puspè terra sut ils pes. Ed ella ta mussa da las giadas er che ti tatezza n’has betg da star en il center. Cun in tal fundament es ti er abla da t’occupar cun auters, da viver empaticamain, da vesair conumans che sfundran gist en il tal tsunami. Lura pos ti metter il focus in pau auter che adina sin tatezza.

Igl è impurtant sa savair ch’i ta va bain. Sche quai è uschia tes fundament, e per fortuna hai jau survegnì quai da chasa, lura vegnan ins propi abla da s’engaschar per auters. Saja quai en maniera politica, sco che jau fatsch quai. O saja quai en il sectur privat. Quai po adina puspè esser en la vita dal mintgadi, nua ch’ins vesa simplamain nua ch’ins pudess forsa gidar. Forsa datti là ina persuna che fiss cuntenta sche insatgi telefonass ina giada e dumandass: “Hallo, co ta va quai? Nua stas? Possa forsa far insatge per tai?”

Sco docenta sun jau in pau sco ina mamma. Jau stoss dar vinavant bler dapli co be cuntegns. Jau hai er d’esser in exempel. Sco docenta hai jau da dir: «Igl è impurtant e dretg che Vus avais finamiras a las qualas Vus vulais arrivar. Ma betg far quai simplamain sin custs dad auters.» Quai è insatge dal pli impurtant. E quai è er insatge che po m’agitar il pli fitg, sche glieud viva sin custs dad auters u sur auters vi. Quai ma para insatge dal pli nuncorrect che po be dar.