Jeu sun in catolic practicont e cartent e jeu mondel mintga dumengia a messa. Jeu fetsch mias oraziuns, aber buca tenor in schema special, aber setegnel vid quei ch’ei pusseivel da nossa Baselgia. Jeu hai era da far bia cun la Baselgia perquei che jeu sundel e lavurel en ina claustra, perquei che jeu entaupel adina puspei paders che han da far mintga di cun la liturgia. Ed era entras miu studi sco musicist da baselgia enconuschel jeu naturalmein fetg bia. Jeu hai la religiun che dat a mi in grond sustegn l’entira veta.

Jeu meinel adina puspei in discuors cun Diu, magari era sur Nossadunna. Nus vein cheu en baselgia in liug da pelegrinadi cun la mater misericordiae. En sesez hai jeu entschiet mia carriera sco musicist en quella baselgia, cun tschun canzuns. Quei ei stau per mei aschia il coc, danunder ora che jeu hai entschiet a far tut quei che jeu fetsch. Perquei mon jeu era savens anavos en quei liug, sco in ritual, per seviver viaden en la cardientscha.

Da l’autra vart hai jeu mes discuors cun Niessegner la notg sche jeu sai buca durmir, perquei che jeu sun in che diermel pauc e sundel bia neunavon. Aschia che jeu saiel far da tuts discuors. Savens en oraziuns, perquei che jeu hai empriu biaras per romontsch e per latin ed era per tudestg. Aschia che jeu sai era schar ir magari ina litania senza gronds problems, aschia che jeu sedurmentel lu en. Ei dat lu bunamein sco ina meditaziun quietonta. Magari ditgel jeu: «Was betrübst du dich, meine Seele und bist so kümmerlich in mir», ni aschia, aber quei ei plitost per quietar. Ils biars texts vegnan era ord psalms ni canzuns ch’ein vegnidas messas en musica. Lu sai jeu semplamein schar ir quella musica tras il tgau cun quei text.

«Quis cantat bis orat». Quei vul dir: Tgi che conta, fa dublamein oraziun. La musica ei naturalmein aschia ch’ella gida da seprofundar pli profund viaden en in text. Aber ella gida era da l’autra vart, sco musicist, da capir meglier in cumponist. Quei vul dir: Jeu vesel practicamein, con religius ch’il Mendelssohn ei staus. Jeu stoi mo tedlar co el metta entuorn en musica certs psalms p.ex., e lu sai jeu: cheu sto esser stau ina gronda cardientscha. Ni era tier Mozart, ch’ei pia in classicher, che ha buca fatg tonta musica da baselgia, forsa sco in Mendelssohn, aber che ha, entras la musica ch’el ha fatg, dau ina schi gronda profunditad cun fetg paucs tacts. E lu vesan ins tuttina che quei era buca «maschinell», quei ch’els fagevan, mobein quels vevan ina gronda cardientscha e quella gida ussa mei puspei da capir meglier ils texts religius aber era da crer.