Jau n’hai nagina cretta religiusa en il senn classic dal pled. Sche jau avess da classifitgar mamez, schess jau d’esser agnostic. Dumondas religiusas m’interessan dentant. Igl è remartgabel, ch’i n’ha dà anc mai ina societad che pudeva exister senza persvasiuns religiusas. E sche quellas eran vegnidas remplazzadas tras autras persvasiuns nun religiusas, inspiradas tras ideologias secularas, èn quellas sa mussadas savens sco mender che religiuns.

Jau sun naschì en ina regiun catolica e sun perquai tschiffà d’ina cultura sociologica catolica. Jau n’arriv betg d’ina famiglia da catolics pratitgants. Cur che jau hai cumenzà da pensar mamez, hai jau refusà diversas persvasiuns che ma parevan absurdas. La pedagogia da la baselgia – nus discurrin dal temp avant il segund concil vatican – basava quella giada sin tema: “Sche ti fas quai, vegns ti en l’enfiern!” Ins po s’imaginar, tge influenza che quai pudeva avair sin uffants da 7-8 onns.

Il cristianissem represchenta dentant valurs che jau part per gronda part. Jau discur da valurs evangelicas, na betg da ductrinas da las baselgias differentas. Jau lasch las ductrinas da la vart, cumbain che jau sun da las giadas interessà da leger texts da crettaivels che expriman lur punct da vista e lur maniera da viver.

Valurs evangelicas èn per mai princips fundamentals: Jau pens a la solidaritad u a l’egualitad da tut ils umans, ch’èn frars e soras ed han ils medems dretgs. Jau pens er ad insaquantas maximas biblicas sco per exempel il respect da la persuna u il scumond da mazzar. Essenzialmain è quai la quintessenza da quellas valurs sin las qualas ch’è construida nossa societad democratica moderna che crai en il stadi dal dretg e l’egualitad fundamentala dals umans che per nus èn dretgs inalienabels.