La cretta è en mia vita da fitg grond’ impurtanza. Ma igl è ina cretta nunecclesiastica. Jau sun fitg religius. Sche jau saja pietus, quai han auters da giuditgar. L’uraziun per exempel gioga ina gronda rolla en mia vita dal mintgadi. Jau schess d’urar al Dieu dal cristianissem. Jau hai er tschertas difficultads da m’imaginar la Trinitad. Pli probabel han quai bleras cristianas e blers cristians. Ma Dieu il Bab, quai è per mai insatge fitg impurtant.

D’esser in uman religius signifitga per mai che jau na poss betg m’imaginar ina vita senza la cretta. Damai, jau na poss betg m’imaginar d’esser ateist. Anc mai en mia vita n’haja m’imaginà ch’i na dettia nagut u ch’i na vegnia nagut suenter la mort. Quai è per mai cumplettamain ester.

Sche jau na crajess betg, alura mancass tut, damai l’entir fundament da mia vita. La vita fiss senza senn. La vita sin questa terra è per mai vairamain be ina preparaziun per insatge pli tard e pli grond. Quai hai jau emprais sin la via da son Giachen. La via da son Giachen m’ha fitg midà. Ussa ves jau mia vita entira sco in pelegrinadi. Mintga di è in’ etappa sin ina via da pelegrinadi. E sche jau guard enavos, daventa la via adina pli lunga. E sche jau guard enavant, daventa la via vi pli curta. E mintga notg, e quai è part da mi’ uraziun da notg, mintga notg è in albiert. La notg è damai l’albiert en il qual jau entrel e rog per la protecziun da Dieu e ch’el laschia ma svegliar puspè la damaun. Ed alura cumenza ina nov’ etappa. Jau hai in fitg ferm sentiment da la vita sco pelegrinadi. E sco ditg, quai è vegni sin la via da son Giachen.

Dad in reverenda refurmà hai jau udi ina giada ina grondiusa definiziun da la cretta, numnadamain: “Discurra be, sche ti vegns dumandà, ma ta cumporta talmain che ti vegns dumandà.” Quai è per mai ina mirvegliusa definiziun da cretta.