La cretta ha ina plazza impurtanta en mia vita. Ma da las giadas l’emblid jau. Jau bad quai, cur che jau fatsch in sbagl. E lura vom jau enavos e fatsch in reset.

Jau sun conscient d’avair fatg in sbagl u che jau avess stuì dir insatge auter. Quai ma capita mintga di.

Jau discur cun Dieu sur da tut: sur da chaussas fitg persunalas che ma tutgan, ma er sur da quai che capita en il mund, la guerra u chaussas banalas. Jau discur cuntinuantamain cun el. Sche jau sun sulet, va en mes chau d’in cuntin in dialog.

Mintgatant menziunan ils umans Dieu en connex cun l’aura, sco per exempel cur ch’igl è adina trid’aura. Jau sun disà d’al dumandar per agid, cur ch’i dat in problem. Quai hai jau fatg gia diversas giadas. Jau ma regord che jau avant ina dunsaina d’onns sun vegnì clamà a las dus la notg, perquai che las vatgas eran mitschadas dal curtin a Cavaglia. Igl era tard en la notg e jau era sulet. Jau avess pudì clamar auters per agid, ma jau n’hai betg vulì disturbar insatgi. Jau hai mess mia fiduzia en Dieu. Jau al hai ditg: “Jau sun tes servient. Ma di, tge che jau duai far.” Jau sun ì en mes auto ed hai chattà las vatgas en vischinanza da la Val Varuna. Jau hai fermà l’auto ed hai muventà las vatgas da midar la direcziun. Ed en in batterdegl èn ellas returnadas en il curtin. I n’avess betg pudì ir meglier.

Precis, jau hai emprais ch’i basta savens da rugar Dieu, empè da s’agitar. Jau n’hai betg survegnì respostas directas, ma jau hai renconuschì concretamain quel agid ch’ins survegn, sch’ins crai.

Jau ma regord d’ina lecziun, che jau aveva survegnì en scola da la magistra da religiun. Ella m’aveva rendì attent ch’ils umans din savens che “la sanadad saja il pli impurtant”. Ella ans ha dumandads dentant da ponderar che la cretta saja anc pli impurtant. Jau pens ch’ella haja gì raschun. Jau hai persunalmain fatg quella experientscha e poss quai confermar. Grazia a la cretta èsi pussibel da surventscher tut auter. Quai è mia filosofia.