Tar in president communal, u surtut tar mai, vegn bain avant la cretta en in‘ u l’autra furma en il mintgadi. Sco confirmand per exempel, curt avant mia confirmaziun sun jau stà in pèr giadas a Taizé. Là è stà il pled preferi: la speranza, « l’espérance ». En sasez sun jau in uman che pensa fitg positiv. Jau crai adina en il bun da l’uman. Quai vul dir per mai, ch’ins sto persvader mai l’emprim dal cuntrari. Ma en sasez crai jau en il bun da l’uman e sin la terra. Jau sai bain ch’i n’è betg adina uschia paschaivel. Gist oz vesan ins puspè ch’i n’è betg tut uschia, co ch’i stuess esser. Quai è adina stà uschia.

Jau crai segir en ina pussanza superiura. Quai è segir uschia. Jau sun musicist. Vairamain hai jau vulì studegiar teologia. E lura sun jau daventà in evangelist, ma in evangelist che chanta, per uschè dir. E là annunzian ins vairamain adina il salvament ed il Messias. Quai m’ha fitg influenzà, er tras las differentas instituziuns. Cun singulas instituziuns hai jau dentant gronda fadia. Pli che jau hai fatsch lur conuschientscha, e pli ch’igl è daventà difficil.

Jau hai gì in sir ch’ è stà muslim. Malavita ch’el è mort. Jau hai in quinà gidieu. Jau hai passentà mia vita en chor da mats catolics, jau hai chantà tar trais udientschas dal papa. Jau sez sun stà refurmà e sun entant sorti da la baselgia. Ma jau sun persvadì che glieud che crai insatge, che crai en insatgi, ina pussanza superiura, uschia è quai er tar mai en ina maniera, che quels hajan in grond sustegn en lur vita.

En mintga cas ma dat la cretta en ina pussanza superiura che insacura forsa er vegn a giuditgar u er betg, che quella ma dat la forza da vesair adina puspè insatge positiv, mintga di. Ed er da betg dar si la buna cretta en ils umans, er sche quai è per part in pau difficil.