D’ina vart è la cretta per mai ina forza e segirezza centrala, gist er in situaziuns difficilas. Nua che jau hai bain mintgatant il sentiment, gea, i dat er insatge che ma sustegna e che ma gida. E quel vegn bain a ranschar tut. Igl ha in senn ch’igl è sco ch’igl è, e ch’i vegn sco ch’i vegn. Quai è in aspect. L’auter aspect è che jau hai l’impressiun che la vita è per mai en sasez simplamain etica. E jau emprov d’avair agir etic adina puspè preschent sco decisiv per mia vita e sco fundament da mias decisiuns.

Da discurrer davart la cretta è difficila per mai. La cretta è insatge ch’ è en mamezza. Da discurrer davart la cretta signifitga dentant er da mussar ella vers anora. E quai èn ils dus nivels differents. Quai n’è betg il medem. Cretta è insatge fitg persunal. E quai è per mai in motiv, perquai ch’igl è difficil da mussar quai vers anora. D’ina vart mussa ins qua tras l’atgna vulnerabladad e blers aspects persunals. Quai è insatge ch’ins na vul segiramain betg far dapertut ed adina. Quai èn ils facturs che mainan a da quella da ponderar fitg bain, nua ed en qual connex e cun tgi ch’ins discurra davart la cretta.

Jau na ma regord betg a gnanc’ ina situaziun concreta, nua che jau poss dir: precis là m’hai jau basà sin la cretta. En la vita dal mintga di è quai simplamain il sentiment dascus ed in pau a la zuppada dad ina tscherta segirezza d’esser en buns mauns, o che jau na sun betg suletta.